Ийэ5э ытыктабылбыт, кини үрдүк аатыгар сүгүрүйүүбүт бэлиэтинэн, Алтынньы ый 15 күнүгэр «Ийэ барахсан истиҥ, кэрэ…» диэн үөрүүлээх киэһэбит хаһааҥҥытааҕар даҕаны өрө көтөҕүүлээхтик буолан ааста.

Аппааны бөһүөлэгин «Арчы» сынньалаҥ киинигэр тэринэн мустан, бырааһынньыктыы Хатыҥ-Арыы нэһилиэк түөлбэлэрин кэрэ аҥардара, күн күбэй ийэлэрэ кыттыыны ыллылар.

Аппааны бөһүөлэгиттэн «Чэчир», «Виктория», «Ыччат квартала», Кыһыл Дэриэбинэттэн «Сандаара», Граф Биэрэгиттэн «АЛРОСА», «Солнечнай» олохтоохторуттан 7-лии эдэр ийэ кыттыыны ылбыта биһирэнэр, Аппааныттан «Саһарҕа» түөлбэттэн элбэх оҕолоох күн күбэй ийэлэр кыттыыны ылан сүрдээх үчүгэйдик тэринэн, остуолларын тус туспа стиллээн олус сэргэх сонун тэрээһин буолан ааста.

Ийэ күнүнэн «Хатыҥ-Арыы нэһилиэк» МТ Баһылыга Слепцов Юрий Иннокентьевич күн күбэй ийэлэргэ, эйэҕэс эбээлэргэ истиҥ эҕэрдэ тылынан бырааһынньыктааҕы киэһэбит саҕаланна! 

Элбэх оҕолоох эдэр ийэ «Хатыҥ-Арыы нэһилиэк» МТ активист ийэлэриттэн биирдэстэрэ, Нам улууһун «Намыына» автоледи кулууп салайааччыта, «Виктория» түөлбэ биир тутаах көхтөөх олохтооҕо Екатерина Соловьева Республика «АВТОЛЕДИ» түмсүү дьахталларын кытта Монголия баран кэлбиттэрин дьонугар-сэргэтигэр сиһилии кэпсээн тэрээһини киэргэттэ.

Күндү ийэлэрбитигэр анаан истиҥ эҕэрдэ нүөмэрдэр, конкурс кыттааччыларыгар үгүс араас көрдөөх конкурстар ыытылыннылар, ол курдук, тутатына прическа, макияж оҥоруутугар, хамаанданан оҕуруо тиһии, РФ үрдүнэн Киинэ сылыгар анаммыт Россия киинэлэрин чопчу таайыыга о.д.а. интэриэһинэй оонньууларга кыттан түбүктээх үлэ кэнниттэн астына-дуоһуйа сынньалаҥҥарын атаардылар.