Олунньу ый 18 күнүгэр, Нам улууһун Хамаҕатта бөһүөлэгин “Түһүлгэ” сынньалаҥ киинигэр, саха дьахталлларыттан бастакы мелодист, Светлана Кудрина ырыаларыгар оҕолорго уонна улахан дьоҥҥо улуустааҕы ырыа күрэҕэ өрө көтөҕүүлээхтик буолан ааста. Бу конкурска улахан дьоҥҥо Наммыт улууһун нэһилиэктэриттэн ансаамбыллар, квартеттар, триолар, соло кыттыыны ыланнар. Светлана Кудрина ырыаларын норуот сөбүлээн ыллыырын өссө төгүл дакаастаатылар.

Дьүүллүүр сүбэҕэ председателинэн СР народнай артыыһа, Саха эстрадатын биллиилээх ырыаһыта, мелодист Алексей Егоров, ону таһынан СР үтүөлээх артыыһа, мелодист Владимир Татаринов, Саха республикатын культуратын Үтүөлээх үлэһитэ Елена Александровна Кутукова үлэлээтилэр.

Дьүүллүүр сүбэ түмүгүнэн; III ст. лауреат аатын - Любовь Иванова, II cт. лауреат аатын - «Нарыйаана» вокальнай ансаамбыл Нам сел., I степеннээх лауреат аатын «Мичийэ» трио (Аппааны бөһүөлэгэ) ылан үөрдүлэр-көттүлэр. Гран-При аатын Александра Кривогорницына (Хамаҕатта бөһүөлэгэ) ылан кыайыылааҕынан буолла. Кыттааччылар сыаналаах бирииһинэн, грамоталарынан наҕаараадаланнылар.

Ырыа – ыра санаа ымыыта буолан, кэрэ суолга ыҥыра, угуйа туруохтун!