Хатыҥ-Арыы нэһилиэк төрүттэммитэ 205 сылыгар аналлаах ыытыллар «Таптыаҕыҥ бу кэрэ дойдуну» тэрээһиннэр.

Ахсынньы ый 1 күнүгэр, күнүс 11.00 ч. – Биһиги биир дойдулаахпыт, киэн туттар киһибит - саха биир биллэр мелодист-композитора - Захар Порфирьевич Винокуров быйыл төрөөбүтэ 95 сыла.

З.П.Винокуров аймахтарын дьиэтигэр өйдөбүнньүк кини аатын үйэтитэр мемориальнай дуоска туруоруута уонна кини аатынан уулуссаны уотунан сырдатыы.

Захар Порфирьевич барыта 50-тан тахса ырыаны айбыта. Композитор баара-суоҕа 35 сыл олох олорбута, бу аҕыйах сылтан айар үлэнэн дьарыктанарыгар 7-8 сыл курдук тиксибитэ. Эдэр композитор дьаныардаахтык үлэлээн, төрөөбүт норуотугар аҕыйах да буоллар чаҕылхай, кэрэ ырыалары бэлэхтээн хаалларбыта.

Үөрүүлээх түгэҥҥэ кыттыыны ыллылар: СР Культуратын Министрин солбуйааччы Силина Марина Владимировна, СР уонна Россия народнай артыыһа Иван Прокопьевич Степанов, баянист СР искусствотын үтүөлээх үлэһитэ Радомир Борисов, Захар Порфирьевич Винокуров бииргэ төрөөбүт балта Мария Порфирьевна Винокурова, күтүөтэ Панкратий Дмитриевич Петров, сиэттэрэ Майя Панкратьевна, Анна Панкратьевна.