Алтынньы ый 26 күнүгэр Аппааны бөһүөлэгэр «Чороон» сынньалаҥ киин БҮТҮН СОЮЗТААҔЫ ЫЧЧАТ ЛЕНИНСКЭЙ КОМСОМОЛА ТӨРҮТТЭММИТЭ 100 СЫЛЫН көрсө «ЭН КОМСОМОЛ - МИН ДЬОЛУМ» диэн бэрт сэргэх, истиҥ тэрээһин ыытта.

Бу күн оччотооҕу кэм араас сылларга «Карл Маркс» колхозка уонна «Хатын-Арыы» совхозка үлэлээбит комсомольскай секретарьдарын ахтан-санаан ааһар үтүө түгэн буолла.

«Хатыҥ-Арыы нэһилиэк» МТ Баһылыгын эбээһинэһин толорооччу Марков Герман Герасимович кэлбит ыалдьыттары, урукку кэм комсомолларын, билигин да үлэ үөһүгэр сылдьар ветераннары уонна оччотооҕу кэм эдэр ыччатын истиҥник эҕэрдэлээн тыл эттэ уонна Комсомол төрүттэммитэ 100 сылын бэлиэтиир ЮБИЛЕЙНАЙ ЗНАКТАРЫ туттартаата.

Э5эрдэ тыл уонна ахтыы эттэ «Карл Маркс» колхоз комсомольскай тэрилтэ секретээринэн улэлээбит, тыыл ветерана Герасим Афанасьевич Марков.

Комсомол төлөннөөх кэмнэрин ахтан- санаан аастылар ыалдьыттарбыт Бөтүҥ уонна Искра нэһилиэгин делегациялара. Ону тэҥэ Нам улууһун ветераннарын сэбиэтин председателэ Михаил Сергеевич Баишев бүгүҥҥү бырааһынньыгынан эҕэрдэлээтэ, «Махтал сурук» туттартаата.

«Комсомол – мин дьолум» тэрээһини иилээн-саҕалаан ыытта СӨ Культуратын туйгуна Василий Бурнашев.

«Чороон» с.к. үлэһиттэрэ ансаамбыл тэрийэн баяҥҥа доҕуһуоллаан «Эн Комсомол», «Доҕордоһуу ырыата» ырыалары толорон бэлэх ууннулар. Ону кытта эдэр кэскиллээх ырыаһыт Алексей Слепцов маанылаах ыалдьыттарбытыгар ылбаҕай ырыа бэлэхтээн ытык-мааны саастаах дьоммут үөрүүлэрэ үгүс.

Урукку кэм комсомолларын, эдэр саас кэрэ кэмнэрин ахтыһа, көрсүһэ кэлбит кунду дьоммутун биллэр ыытааччы, 80-сыллааҕы дискотека легендата, «Ностальжи» биэчэрдэри аан бастаан тэрийбит Василий Чупров уонна СӨ Культуратын Үтүөлээх үлэһитэ, ырыаһыт, мелодист Степан Васильев истиҥ ырыаны анаатылар, көрдөөх-нардаах киэһэни ыыттылар.