Ахсынньы 23 күнүгэр олус долгутуулаах түгэн буолла. “Тулаайах оҕолору дьиэнэн хааччыйыыы” республиканскай программанан Хатыҥ-Арыы нэһилиэгин  Аппааны бөһүөлэгэр 4 квартиралаах толору хааччыллыылаах, аныгы технологиянан тутуллубут дьиэ арыллыыта үөрүүлээх быһыыга-майгыга ыытылынна. Бу күн “Нам улууһа” МТ Баһылыгын солбуйааччы Мария Семеновна Игнатьева, улуус депутаттарын сэбиэтин председателэ Попов  Иван Романович, опека уонна попечительство отделын начальнига Мария Иннокентьевна Петрова, бэдэрээтчит “Намстрой” ХЭТ генеральнай директора Кутуков Вадим Валерьевич, “Хатыҥ-Арыы нэһилиэк” Баһылыга Ноговицын Иван Дмитриевич уонна Бөтүҥ, Искра Баһылыктара саҥа квартиралар хаһаайыттарын эҕэрдэлээн туран үтүмэн элбэх үөрүүнү, ситиһиилэри, дьоллоох олоҕу баҕардылар, сэмэй бэлэхтэрин туттардылар. Петр Охлопков сахалыы сиэри-туому тутуһан саҥа алаһа дьиэлэри алҕаата.
Петр Машников ылбаҕай ырыатынан саҥа дьиэ хаһаайыттарын, ыалдьыттары эҕэрдэлээтэ. Итиэннэ ийэ, аҕа тапталын билбэккэ улааппыт ыччаттар, саҥа дьиэ хаһаайыттара маннык дьолго тиксибиттэриттэн олус үөрбүттэрин бэлиэтээн, салайааччыларга махтал тылларын анаатылар.