«Туллук хаара» мелодистар түмсүүлэрин чилиэнэ, олохтоох мелодистка Люция Семеновна Евсеева – Суһумнуура «Ыллаа хатыҥ тыллыыта, ыллаа күһүн кэлиитэ» иккис ырыанньык-кинигэтэ сүрэхтэммит үөрүүлээх күнэ муус устар 22 күнүгэр И.Е. Винокуров аатынан кыраайы үөрэтэр музейыгар “Чороон” НАК ыытта. Бу күн нэһилиэк ансаамбыллара, ырыаһыттара, уус-уран самодеятельность кыттыылаахтара, И.Е. Винокуров аатынан Хатыҥ-Арыы орто оскуолатын үөрэнээччилэрэ Люция Евсеева – Суһумнуура айбыт ырыаларын ыллаатылар, хоһооннорун аахтылар. Ырыанньыгы хомуйан таһаарда Люция Семеновна балта Парникова Ю. Ю, музыкальнай редактор Пономарева Г.А. Ыҥырыылаах ыалдьыттар эҕэрдэ тыл бастыҥын анаатылар, “Нам улууһа” МТ Баһылыгын Ю.И. Слепцов Бочуотунай Грамота туттарылынна, “Хатыҥ-Арыы нэһилиэк” МТ Баһылыга Ноговицын И.Д. “Хатыҥ-Арыы нэһилиэгин Ытык Киһитэ” үрдүк аат иҥэриллибитинэн бэлиэ туттарда, “Нам улууһа” МТ Культураҕа уонна Духуобунай сайдыыга Управлениетын начальнига Е.А. Заровняева “Нам улууһун култууратын сайдыытыгар кылаатын иһин” бэлиэни туттарда.