Россияҕа норуот айымньытын уонна культурнай нэһилиэстибэтин, Саха АССР төрүттэммитэ 100, Саха сирин уһулуччулаах Государственнай, политическай деятелэ Максим Кирович Аммосов төрөөбүтэ  125 уонна самодеятельнай композитор Захар Порфирьевич Винокуров төрөөбүтэ 100 сылларыгар анаммыт Хатыҥ-Арыы нэһилиэгин ҮРҮҤ ТУНАХ  ЫҺЫАҔА бэс ыйын 21 күнүгэр  “Хатын-Чараҥ” ыһыахтыыр пааркабытыгар үрдүк таһымҥа ыытылынна. ЫҺЫАХ ҮӨРҮҮЛЭЭХ АҺЫЛЛЫЫТЫН СИЭРИГЭР-ТУОМУГАР нэһилиэкпит олохтоохторо, тэрилтэлэр үлэһиттэрэ көхтөөх кыттыыны ыллылар. ЫҺЫАХ ҮӨРҮҮЛЭЭХ ЧААҺЫГАР „Нам улууһа“ МТ Баһылыга  Слепцов Ю.И., СР Тыатын хаһаайыстыбатын Министрэ Атласов А.П., СР бэйэни салайыныы департаменын салайааччы Попов И.Р., „Хатыҥ-Арыы нэһилиэк“ МТ Баһылыга Ноговицын И.Д. уонна быйыл үбүлүөйдээх саха норуотун композитора З.П. Винокуров чугас аймахтара кыттыыны ыллылар. „УЙГУЛААХ САЙЫММЫТ ЫҺЫАҔА“ эҕэрдэ кэнсиэргэ нэһилиэкпит вокальнай ансаамбыллара, оҕо-улахан дьон үҥкүү ансаамбыллара, фольклорнай бөлөх ыһыах мааны ыалдьыттарын эҕэрдэлээтилэр. „Сахалыы таҥнан киэркэйиэх“ саха таҥаһын көрүүтүн күрэҕэ ыытылынна - Дьиэ кэргэнинэн кыттыы, Дьахтар сахалыы таҥаһа уонна Халадаай былааччыйаҕа.Ыһыах бары кыттыылаахтарын, ыалдьыттарын „Туймаада“ Государственнай вокальнай ансамбла ылбаҕай ырыаларынан эҕэрдэ кэнсиэр бэлэх уунна. Үгэс быһыытынан Киин түһүлгэҕэ – „Өбүгэ оонньуулара“ спортивнай күрэх Хатыҥ-Арыы нэһилиэгин олохтоох уолаттарыгар анаан ыытылынна; Ону сэргэ Оҕо уонна Фольклор түһүлгэлэригэр конкурстар, күрэхтэһиилэр, кэнсиэртэр ыытыллан дьон-сэргэ үөрүүтэ үгүс. Киэһээтин Саха эстрадатын ырыаһыттарын Сахая, Александр Бурнашевтар, Кирилл Матвеев эҕэрдэ кэнсиэрэ буолла.