Сахалартан бастакы самодеятельнай композитор Захар Порфирьевич Винокуров төрөөбүтэ 100 сылынан ПААМАТЫННЬЫК АРЫЙЫЫ үөрүүлээх тэрээһинэ, бүгүн сэтинньи 11 күнүгэр ыытылынна. Биһиги биир дойдулаахпыт, киэн туттар киһибит - саха биир бастакы биллэр мелодист-композитора - Захар Порфирьевич Винокуров быйыл төрөөбүтэ 100 сылын чэрчитинэн “Хатыҥ-Арыы нэһилиэк” МТ олохтоох дьаһалтата уонна “Чороон” НАК көҕүлээһининэн Захар Порфирьевич Винокуров пааматынньыга оҥоһуллан үлэҕэ киирэр үөрүүлээх күнэ ыытылынна.  Бүгүҥҥү үөрүүлээх күҥҥэ Захар Порфирьевич Винокуров аатын үйэтитэн аймахтара, нэһилиэкпит тэрилтэлэрэ, нэһилиэнньэ уонна олохтоох дьаһалтаттан үп-харчы көрүллэн,  пааматынньыгы арыйыы үөрүүлээх чааһыгар муһуннулар.

Пааматынньыгы арыйан бар дьоҥҥо биллиилээх композитор үйэтитиллибит мөссүөнүн көрдөрөр түгэн тосхойдо! Захар Порфирьевич Винокуров пааматынньыгын арыйдылар - “Нам улууһа” МТ Баһылыга Юрий Иннокентьевич Слепцов, “Хатыҥ-Арыы нэһилиэк” МТ Баһылыга Иван Дмитриевич Ноговицын, Захар Порфирьевич Винокуров пааматынньыгын оҥорбут автор, Россия архитектордарын Союһун чилиэнэ Сергей Иннокентьевич Лукин, З.П. Винокуров аймаҕа Захар Иванович Винокуров уонна Захар Порфирьевич Винокуров аатынан Намнааҕы Оҕо искусствотын оскуолатын Хатыҥ-Арыытаа5ы филиалын хореографияҕа 4 уонна художественнай салааҕа 3 кылааһын үөрэнээччитэ Настя Винокурова.

Ол кэннэ салгыы “Чороон” НАКиинигэр  ыытыллар үөрүүлээх тэрээһин буолла. Кыттыыны ыллылар Российскай Федерация уонна Саха Республикатын народнай артыыһа ИВАН ПРОКОПЬЕВИЧ СТЕПАНОВ, Суорун Омоллоон аатынын Опера уонна балет театрын солисткалара Саргылана Павлова, Дина Охлопкова, А.Д. Макарова аатынан Дьокуускайдааҕы культура уонна искусства колледжын хоровой дирижирование салаатын 4 курсун устудьуоннара «Үрдэл» вокальнай ансаамбыл, З.П. Винокуров аатынан Оҕо искусствотын оскуолатын үөрэнээччилэрэ, “Кытыл кыыма”, “Ивушка” вокальнай ансаамбыллар.