СР Ил Дарханын Ыйааҕынан, 2012 сылтан саҕалаан, биһиги республикабытыгар, Саха сирин норуоттарын уус-уран оҥоһуктарын, искусстволарын араҥаччылыыр, сөргүтэр уонна сайыннарар сыаллаах, Норуот маастардарын күнэ бэлиэтэнэр. Кулун тутар 5 күнүгэр Норуот маастардарын күнүн чэрчитинэн Орджоникидзе болуоссатыттан Ленин болуоссатыгар диэри кыһыҥҥы национальнай көстүүмнээх дьон сэлэлии хаамыыта буолан ааста. Биһиги нэһилиэкпититтэн «Далбар» түмсүү кэрэ аҥардара кыттыыны ыллылар, ол курдук Лебедева Оксана Ивановна, Куличкина Прасковья Ивановна, Никифорова Татьяна Матвеевна, Петрова Наталья Николаевна, Павлова Марфа Егоровна, Евсеева Татьяна Ивановна, Колесова Тамара Ивановна.

А.Е. Кулаковскай аатынан культура дьиэтигэр уус-уран тарбахтаахтар уонна норуот маастардарын быыставката турда. Быыстапкаҕа Прасковья Ивановна Куличкина, Дария Ивановна Мальцева уонна Любовь Ильинична Попова, сиэнэ Жирков Гриша үлэлэрэ дьон биһирэбилин ылла. Үөрүүлээх тэрээһиҥҥэ, культура министирин солбуйааччы Ноев Афанасий Иванович, Любовь Ильиничнаҕа «Норуот маастара» үрдүк аатын туттарда. Нэһилиэкпит аатын ааттата сылдьар уран тарбахтаах маастардарбытыгар ис сүрэхтэн эҕэрдэбитин тиэрдэбит, эһигиннэн киэн туттабыт. Үүнэр көлүөнэҕэ, ыччакка холобур буолан өссө үрдүк ситиһиилэри баҕарабыт.