Кулун тутар 8 күнэ – Аан дойдуга кэрэ аҥар күнэ - Бу күн Далбар хотуттары, иэримэ дьиэ иэйэхситтэрин, алаһа дьиэ аанньалларын, туруу дьиэ тутаах дьонун, байдам дьиэ бааттаах хаһаайкаларын, бука барыгытын Кэрэ аҥардар бырааһынньыктарынан итиитик- истинник эҕэрдэлээн кулун тутар 7 күнүгэр “Чороон” НАК олус үчүгэй тэрээһин ыытылынна.

2022 сыл – СР Ийэ сылынан биллэриллибитэ, сыл түмүгүнэн ситиһиилээх, үрдүк көрдөрүүлээх Ийэлэргэ наҕараада туттарыы үөрүүлээх чааһыгар “Хатыҥ-Арыы нэһилиэк” МТ Баһылыга Иван Дмитриевич Ноговицын эҕэрдэ тылын уонна үрдүкү наҕараадалары туттартаата, ол курдук Попова Любовь Ильинична – “СР норуот маастара”, Куличкина Прасковья Ивановна “СР уус-уран оҥоһуктарын маастара”, “Бастыҥ Ийэ” элбэх оҕолоох, общественница, “Далбар” дьахтар сэбиэтин председателя Мальцева Дария Ивановна үрдүк ааттары туттулар уонна “Нам улууһа” МТ Баһылыгыттан бу ааспыт сылга ситиһиилэрдээх Ийэлэргэ Махтал суруктар туттарылыннылар.

Бары күүппүт, кэтэспит кэрэ куоларга анаан Хатыҥ-Арыы нэһилиэгин түөлбэлэрин икки ардыларыгар “КЭРЭ КУО - 2023” эдэр кыргыттарга кэрэ көстүү, талаан конкурсун ыытылынна. Бу конкурска кыргыттар талааннарын, туохха дьоҕурдаахтарын көрдөрдүлэр, кэрэ киэһэни киэргэттилэр.

6 түөлбэттэн кыттыыны ыллылар, ол курдук: “Озернай” түөлбэттэн Аида Алексеева, “Саһарҕа” түөлбэттэн Наилина Сивцева, “Молодежнай” түөлбэттэн Эдуарда Кулешова, “Чэчир”  түөлбэттэн Алена Слепцова, Граф Биэрэгин “Восход” түөлбэттэн Яна Винокурова, “Виктория” түөлбэттэн Юлия Алексеева.

Конкурс 5 түһүмэхтээх буолла: бэйэни билиһиннэрии, уустук ыйытыыларга эппиэттээһин, талааннарын арыйыы, авангарднай мода уонна кэрэ көстүү киэһээҥҥи мааны таҥас көрдөрүүтэ, ол түмүгүнэн “Сааскылаана Куо” анал аат Наилина Сивцева, “Намыына Куо” – Эдуарда Кулешова, “Талба Талаан” – Юлия Алексеева, “Мичийэ Куо” – Аида Алексеева, “Айыы Куо” – Алена Слепцова уонна кыайыылааҕынан “КЭРЭ КУО - 2023” аатын сүктэ Яна Винокурова.   Кыттыбыт кыргыттарга түөлбэлэрин олохтоохторун аатыттан бэлэх бэлэхтэннэ, “Чороон” НАК аатыттан барыларыгар Диплом, сибэкки дьөрбөтүн, кыайыылаахха 5 тыһыынча сууммалаах сертификат уонна корона туттарылынна.

Кыргыттарбытыгар махтанабыт кэрэ киэһэни бэлэхтээбиттэригэр.