Кулун тутар 17 күнүгэр, «Душа России» Аан дойдутааҕы Фестиваль кыттыылаахтара – Москва, Санкт-Петербург, Свердловскай уобаластан, Тула, Рязань, Новосибирск, Киров, Калуга, Астрахань, Калуга, Серпухов, Иваново, Пермь, Самара, Зеленоград куораттан 33 киһилээх делегация, салайааччылара Римма Быбина Хатыҥ-Арыы нэһилиэгэр «Чороон» НАК олохтоохтору кытта көрсүһүү буолла. «Чороон» культура киинигэр нэһилиэк уран тарбахтаахтарын быыстапкатын көрөн сөҕөн-махтайан астыннылар, саха омугун төрүт үҥкүүтүн оһуохайы үҥкүүлээтилэр, оһуохайы таһаарда эдэр кэскиллээх оһуохайдьыт Элеонора Егорова. Ыалдьыттарбыт олус сөбүлээтилэр сэҥээрдилэр. 

Ол кэннэ биир дойдулаахпыт, СР народнай художнига Анна Зверева «Ысыах мастериц» диэн киинэни уонна «Саха» диэн кинигэ презентациятын оҥордо. Бу киинэҕэ уонна кинигэҕэ биһиги нэһилиэкпит олохтоохторо киирбиттэрэ үөртэ.  Күндү ыалдьыттары «Дуораан» уонна «Дорҕоон» фольклорнай бөлөхтөр эҕэрдэлээтилэр, Россия араас куораттарыттан кэлбит Фестиваль кыттыылаахтара сахалыы тыыннаах ырыалары, сахалыы инструменынан доҕуһуолу олус сэҥээрдилэр, олус астыммыттарын туһунан эттилэр.

Бу Аан дойдутааҕы фестиваль делегацията Г.Г. Афанасьева сылгы базатыгар сырыттылар, сыарҕалаах атынан хатааһылаатылар,  С. И. Лукина кыһыҥҥы теплицатыгар көрдүлэр.  Илья Егорович Винокуров аатынан Хатыҥ-Арыы орто оскуолатыгар, Намнааҕы Техникум студеннарын кытта көрсүһүүгэ араас хайысхалаах мастер-класстары ыыттылар.