Муус устар 27 күнэ – саха норуотун олоҕор чахчы быһаарыылаах уонна суолталаах күн буолар. 1922 сыллаахха муус устар 27 күнүгэр  - Саха Автономнай Советскай Социалистическай республика төрүттэммитэ. 70 сыл ааспытын кэнниттэн, 1992 с. Муус устар 27 күнүгэр республикабыт саҥа Конституцияламмыта. Онтон муус устар 27 күнэ – Саха Республикатын күнүнэн биллэриллибитэ.

Бу үөрүүлээх күҥҥэ Хатыҥ-Арыы нэһилиэгин Аппаны бөһүөлэгэр - улуу киһибит, уһулуччулаах Государственнай уонна политическай деятель И.Е. Винокуров пааматынньыгар үөрүүлээх быһыыга-майгыга тыыннаах сибэкки дьөрбөтүн ууруу ыытылынна.

Ытык-мааны ыалдьыттарынан буоллулар: Саха Республикатын Ил Дарханын уонна Саха Республикатын Правительствотын дьаһалтатын салайааччыта Георгий Николаевич Михайлов, «Нам улууһа» МТ Баһылыга Юрий Иннокентьевич Слепцов, СР Тыатын хаһаайыстыбатын Министрэ Александр Павлович Атласов, Нам улууһун куратора, Цена политикатын Государственнай комитетын председателя Антонина Борисовна Винокурова, “Ил Түмэн“ Депутата Елена Христофоровна Голомарева, улууспут нэһилиэктэрин баһылыктара, Правительство чилиэттэрэ, депутаттар, нэһилиэкпит олохтоохторо. 

РФ Үөрэҕириитин бочуоттаах үлэһитэ Анна Ефимовна Васильева салайар “Чаҕылыс” литературнай бөлөх “Хомпоруун хотойбут” литературнай монтаж ааҕан ыалдьыттар биһирэбиллэрин ыллылар.

Эҕэрдэ тыл эттилэр: Саха Республикатын Ил Дарханын уонна Саха Республикатын Правительствотын дьаһалтатын салайааччыта Георгий Николаевич МИХАЙЛОВ, «Нам улууһа» МТ Баһылыга Юрий Иннокентьевич СЛЕПЦОВ, «Хатыҥ- Арыы» МТ баһылыга - Иван Дмитриевич НОГОВИЦЫН, Хатыҥ-Арыы нэһилиэгин ыччатын аатыттан  – «Хатыҥ-Арыы нэһилиэк» МТ ыччат политикатын специалиһа Анастасия Вячеславовна ЯДРЕЕВА.

Нэһилиэкпит олохтоохторун бука барыгытын төрөөбүт дойдубут, Сахабыт Республикатын күнүнэн истиҥник эҕэрдэлиибит!

Тапталлаах дойдубут сайда, чэчирии турдун!