Алтынньы 12 күнүгэр, «Чороон» НАК саҥа үлэ сезонун арыйан, Саха сиригэр Ийэлэр күннэригэр аналлаах «Ийэ дьоло – оҕоҕо» диэн тэрээһин буолан ааста. И.Е.Винокуров аатынан Х-АОО үөрэнээччилэрэ уонна төрөппүттэр кыттыылаах, иһирэх иэйэхситтэргэ, күндү күбэй ийэлэргэ, ис сүрэхтэн махтанан туран ырыа-хоһоон, үҥкүү кэрэтин көрдөрдүлэр. Ырыалары, хоһооннору бэлэмнээтэ специалист Г.М. Стрекаловская, үҥкүүлэри бэлэмнээтэ хореограф В.К. Иванова. Кэнсиэри ыыттылар Горьяна Стрекаловская  уонна 10 кылаас үөрэнээччитэ Спартак Багынанов.

Долгутуулаах бырааһынньыгынан, амарах санаалаах аанньалларбытын, истиҥ тылынан эҕэрдэлээтэ «Хатын-Арыы нэһилиэк» МТ Баһылыга И. Д. Ноговицын.

Үөрүүлээх түгэнинэн, үлэ ветерана, нэһилиэк уонна улуус көхтөөх спортсмена, Корчанова Евдокия Поселовна юбилейдаах сылынан «За заслуги перед МО «Хатын-Арынский наслег» бэлиэнэн наҕараадаланна.

Сыл аайы буоларын курдук «Бастыҥ тиэргэн» конкурс түмүгүн таһаарыыта буолла, манна уопсайа 22 чааһынай ыал кыттан, бириистэринэн уонна сертификаттарынан наҕараадаланнылар.

Бу күн нэһилиэкпит уран тарбахтаахтара оҕуруонан оҥоһуктарын быыстапката туран дьон сэҥээриитин ылла.

Дьоро күнү атаара кэлбит нэһилиэк дьоно – сэргэтэ, ытык –мааны ыалдьыттар сэргэхсийэн, дуоһуйан тарҕастылар.