Тохсунньу ый 31 күнүгэр, Хатыҥ-Арыы нэһилиэгин Аппааны бөһүөлэгэр - өбүгэлэрбит кэскиллэрин кэҥэтэр, удьуордарын ууһатар, олох оҥостор сылаас, сырдык, аныгылыы тутуулаах, толору хааччыллыылаах, «Дьону хаарбах дьиэттэн көһөрүү» программатынан 12 кыбартыыралаах саҥа дьиэни Пинигин Алексей Семенович салайааччылаах «ПРОГРЕСС» хааччахтаммыт эппиэтинэстээх тэрилтэ тутан үлэҕэ киллэрэр үөрүүлээх күнэ буолла.

Саҥа дьиэ үөрүүлээх аһыллыытын аалай лиэнтэтин быстылар «Нам улууһа» МТ Баһылыгын 1 солбуйааччыта Павлов А.И., «Хатыҥ-Арыы нэһилиэк» МТ Баһылыга Ноговицын И.Д., «Прогресс» ХЭТ директора Пинигин А.С. уонна саҥа дьиэ кырачаан олохтооҕо Ариан Петухов.

Алгыс тылынан дьиэни ыраастаата, арчылаата – алгысчыт Кривогорницын А.К.

Үөрүүлээх-быһыыга майгыга «Прогресс» тэрилтэ саҥа дьиэ эдэр ыалыгар, Чупровтар дьиэ кэргэттэригэр телевизор бэлэх уунна.

Пинигин А.С. тэрилтэтэ Хатыҥ-Арыы нэһилиэгэр 2 улахан объегы тутан киллэрбитин (35 миэстэлээх Кыһыл Дэриэбинэҕэ «Мичээр» уһуйааны уонна 12 кыбартыыралаах дьиэни), улахан спонсорскай көмө оҥорорун иһин «Хатыҥ-Арыы нэһилиэгин Бочуоттаах олохтооҕо» Бэлиэ туттарылынна.

         Бу үөрүүлээх тэрээһин үрдүк таһымнаахтык ааста.