Олунньу 21 күнүгэр «Чороон» НАК Дьокуускайдааҕы культура уонна искусство колледжын устудьуона Нарыйаана Судинова туруоруутугар Ленинград Блокадата 80 сылыгар аналлаах «Мин өлүөхпүн баҕарбаппын» театрализованнай көстүү үрдүк таһымнаахтык буолан ааста.

Кыттыыны ыллылар «Айар аартык» театральнай кружок иитиллээччилэрэ, салайааччы «Чороон» НАК режиссера Горьяна Стрекаловская. Сүрүн оруоллары толордулар: Таня – Злата Изюмская, Шурик – Толя Сивцев, Юрка – Мирослав Максимов, Маня – Олеся Сивцева, Колька – Айхал Игнатьев, Котька – Антон Макаров, ийэ оруолун толордо Хатын-Арыы орто оскуолатын алын кылаас учуутала Туйара Максимова, Софья Константиновна оруолун толордо «Чороон» НАК уус-уран салайааччыта Марианна Винокурова. Хас биирдии кыттааччы оруолун сиһилии аһан көрөөччү биһирэбилин толору ылла.