Муус устар 27 күнэ – саха норуотун олоҕор чахчы быһаарыылаах уонна суолталаах күн буолар. 1922 сыллаахха муус устар 27 күнүгэр  - Саха Автономнай Советскай Социалистическай республика төрүттэммитэ. 70 сыл ааспытын кэнниттэн, 1992 с. Муус устар 27 күнүгэр республикабыт саҥа Конституцияламмыта. Онтон ыла муус устар 27 күнэ – Саха Республикатын күнүнэн биллэриллибитэ.

Муус устар 25 күнүгэр Хатыҥ-Арыы нэһилиэгэр И.Е. Винокуров аатынан Сквергэ үтүө үгэскэ кубулуйбут Саха Республикатын күнэ үрдүк таһымҥа ыытылынна.

Кыттыыны ыллылар: Саха Республикатын Ил Дарханын уонна Саха Республикатын Правительствотын дьаһалтатын салайааччы Георгий Николаевич МИХАЙЛОВ, Саха Республикатын Ил Түмэн Судаарыстыбаннай мунньаҕын председателин солбуйааччы, «Ил Түмэн» Судаарыстыба тутулугар уонна сокуону оҥорууга сис кэмитиэтин председателэ Афанасий Семенович ВЛАДИМИРОВ, «Нам улууһа» МТ Баһылыгын эбээһинэһин толорооччу Анатолий Иванович ПАВЛОВ, «Нам улууһа» МТ Депутаттарын Сэбиэтин председателя Алексей Иванович ВИНОКУРОВ, «Хатыҥ-Арыы нэһилиэк» МТ Баһылыга Иван Дмитриевич НОГОВИЦЫН уонна Саха Республикатын народнай депутаттара, Саха Республикатын Правительствотын чилиэттэрэ, Нам улууһун, Хатыҥ-Арыы нэһилиэгин олохтоохторо, тэрилтэ салайааччылара, оскуола үөрэнээччилэрэ.

Илья Егорович Винокуров аатынан Хатыҥ-Арыы орто оскуолатын үөрэнээччилэрэ Кристофер Сидоров – “Саха сирэ”, Стеша Охлопкова “Нам улууһун өрөгөйө” хоһооннору ааҕан кэлбит ыалдьыттары эҕэрдэлээтилэр.

Ытык-мааны ыалдьыттар, нэһилиэк олохтоохторо Саха Республиката төрүттэммит күнүгэр – уһулуччулаах Государственнай уонна политическай деятель Илья Егорович Винокуров пааматынньыгар тыыннаах сибэкки дьөрбөтүн уурдулар.

Норуоттан үүнэн тахсыбыт, ыарахан сылларга норуот туһугар оло5ун анаабыт, норуотун чиэһин туруулаһан көмүскээбит государственнай уонна политическай деятель Илья Егорович Винокуров өлбөт-сүппэт өҥөлөрүн билинии, киниэхэ сүгүрүйүү уонна кини аатын үйэтитии барыбыт ытык иэспит буолар.

Бука бары Сахабыт сирин олохтоохторун Саха Республиката төрүттэммит күнүнэн итиитик-истиҥник эҕэрдэлибит!

Тапталлаах дойдубут өрүү үүнэ-сайда турдун!