Дойду үрдүнэн Дьиэ кэргэн, Саха республикатыгар Оҕо саас, Нам улууһугар Оҕо спордун, Хатыҥ-Арыы нэһилиэгэр Доруобуйа, спорт  уонна биир дойдулаахпыт, поэт, тылбаасчыт И.Д. Винокуров -  Ча5ыл5ан төрөөбүтэ 110 сылларыгар анаммыт Хатыҥ-Арыы нэһилиэгин УЙГУЛААХ ЫҺЫАҔА бэс ыйын 26 күнүгэр Кыһыл Дэриэбинэ “Хатыҥ-Чараҥ” ыһыахтыыр түһүлгэтигэр ыытылынна.

          Ыһыах аһыллыыта – сиэртэн-туомтан, арчыланыыттан, ыраастаныыттан саҕаланна. Кыырай халлаан кыргыттара кыталыктар түһэн сирбитин ыраастаан, эрэкэ-дьэрэкэ оҕолор – сир симэхтэрэ үҥкүүлээн, далбар хотуттар сири-уоту түптэ буруотунан арчылаан, ыраастаан Аан Алахчын Хотун киирэн түһүлгэҕэ баар дьону үөрэ-көтө көрүстэ. Аман тыллаах алгысчыт арыалдьыттарын кытта Үрдүк Айыылартан Алгыһы түһэрэн, бар дьонноругар уруйу олохтуу, дьолу тосхойо түөлбэ түһүлгэбитигэр алгыс түһэрдэ. Нэһилиэкпит Баһылыга Ноговицын И.Д. кырылыы кыынньар кымыс үрдүн охторон, олохтоохторугар, ытык-мааны ыалдьыттарыгар уйгуну-быйаҥы баҕарда. Оһуор-мандар ойуулаах, алгыстаах харысхаллаах Ытык Дуо5аны өрө тутан ымыылаах Ыһыахпыт арыллыбытынан мэктиэ туруорда.

          Улууспут Баһылыга Слепцов Ю.И. дьонун-сэргэтин улуу тунах ыһыаҕынан эҕэрдэлээтэ.

          Ыһыах сиэрин-туомун кэнниттэн нэһилиэкпит талба талааннаахтарын эҕэрдэ кэнсиэрэ ыытылынна. Быйылгы ыһыахпыт биир дойдулаахпытыгар И.Д. Винокуров – Чаҕылҕаҥҥа ананан кини хоһооннорунан И.Е. Винокуров аатынан Хатыҥ-Арыы орто оскуолатын “Чаҕылыс” бөлөҕө (сал. Васильева А.Е.) литературнай монтажтан саҕалаата. Эҕэрдэ кэнсиэргэ кыттыыны ыллылар: “Сайдам” оҕо, “Оһуор”, “Сыдьаайа” үҥкүү бөлөхтөрө, “Ивушка” вокальнай ансаамбыл, “Дорҕоон” этно-фольклорнай бөлөх. Ыһыах аһыллыытын добун оһуохайынан түмүктээтибит.

          Түһүлгэлээн олоруу кэннэ киин түһүлгэҕэ “Өбүгэ оонньуулара” олохтоох ыччаттарга күрэх ыытылынна. Кыайыылаах Артем Сивцев “Прогресс” ХЭТ (ген.дир. Пинигин А.С.) туруорбут “РегулМото” мотоциклын ылла. Бары көрүҥҥэ кыайбыт уолаттарга уу харчынан бириэмийэ туттардылар.

          “Оҕо саас” түһүлгэтигэр (“Самородок” сынньалаҥ киин) оҕолорго анаан араас конкурстар, күрэхтэр, оонньуулар, кэнсиэр ыытылынна.

          “Фольклор” түһүлгэтигэр (“Сайдыы” сынньалаҥ киин) чабырҕахха уонна норуот ырыатыгар улахан дьоҥҥо конкурстары ыытта.

          “Эстрада” түһүлгэтигэр сылын аайы “Сахалыы таҥнан киэркэйиэх” диэн дьиэ кэргэнинэн уонна эр дьон толору таҥаһыгар конкурс ыытылынна. Дьиэ кэргэнинэн кыайыылааҕынан эдэр ыаллар – Светлана, Егор Евстафьевтар оҕолорунаан буоллулар, эр дьоҥҥо Алексеев Василий Николаевич кыайан сыаналаах бириистэринэн наҕараадаланнылар. Миэстэлэспит дьон бары үчүгэй бириис ылан, ону таһынан анал бириистэри тутан астынан, үөрэн-көтөн  тарҕастылар.

          Бу күн нэһилиэкпит уран тарбахтаах норуот маастардарыгар – Анна Николаевна Звереваҕа, Елизавета Дмитриевна Олесоваҕа “Народный мастер Намского улуса” диэн үрдүк бэлиэни биир бастакынан улуус Баһылыга уонна Культура Управлениетын начальнига (Ядрихинскай С.П.) үөрүүлээх быһыыга-майгыга туттардылар. 

Нэһилиэкпит олохтоохторугар анаан саха эстрадатын чаҕылҕай ырыаһыттара СР үтүөлээх артыыската Ника уонна СР культуратын туйгуна Эрчим “Уйгу-быйаҥ ыһыаҕынан эҕэрдэ” диэн кэнсиэртэрин бэлэх ууннулар.