Сэтинньи 29 күнүгэр «Чороон» НА киинигэр культура уонна  сцена ветераннарыгар аналлаах «Умнуллубат ааттар» диэн тэрээһин буолан ааста.

Манна биир дойдулаахтарбыт, төрөппүттэрбит, олохторун тухары музыканы, ырыаны-тойугу, үҥкүүнү олох аргыһа оҥостубут, ыччаты кэрэҕэ угуйбут, төрөөн-үөскээн ааспыт, биһиги ытыктыыр дьоммутугар аналлаах «Культура уонна сцена ветераннара» стендэ арыллыытыгар муһуннубут. Бу стендэҕэ олохтоохтор бары ытыктыыр, сүгүрүйэр дьоммут көмүс ааттара, ыраас-кэрэ сэбэрэлэрэ көстөн турар. Нэһилиэкпит сайдыытыгар үгүс кылааттарын киллэрбит дьоммутун үйэтитэн, кэлэр көлүөнэҕэ, эдэр ыччакка элбэҕи кэпсиир стендэ буолан оҥоһуллан таҕыста.

            Нэһилиэкпит умнуллубат ааттарын кэпсиир «Культура уонна сцена ветераннара» стендэни арыйарда, стендэни сүүрэн-көтөн олоххо киллэрбит «Чороон» норуот айымньытын директора, СР культуратын туйгуна С.Д. Пономарева.

«Уус-уран самодеятельноска көхтөөхтүк кыттан, искусство, культура эйгэтигэр бэйэлэрин талааннарын бар дьонноругар өйдөбүл быһыытынан хаалларбыт, үтүө кылааты киллэрбит дьоммутугар ис сүрэхтэн Махтанабыт!» - диэн мустубут дьон ытыс тыаһынан бигэргэттилэр.

Ол кэннэ мустубут дьон саалаҕа киирэн ис сүрэхтэн ананар дьоро киэһэни дуоһуйа көрдүлэр.

Карл Маркс аатынан колхуос саҕаттан ордук таһаарыылаахтык уонна өр кэмҥэ уус-уран самодеятельнаска кыттыбыт дьоммутун барыларын ааттаан-суоллаан ахтан аастыбыт. Урукку саһарбыт хаартыскалар, камерага уһуллубут (видео) кэнсиэрдэри, араас тэрээһиннэри көрөн-истэн, көрөөччүлэр долгуйдулар, дуоһуйдулар. Биһиги нэһилиэкпитигэр Хатыҥ-Арыыга элбэх талааннаах, айар-тутар дьоҕурдаах, олус сэмэй сэргэх дьон төрөөн-үөскээн олорбуттара, айбыттара-туппуттара. Дьон норуот туһугар бары дьоҕурдарын, кыахтарын, билиилэрин-көрүүлэрин, олохторун анаабыттара.

            Бу дьоро күҥҥэ ахтан-санаан аастыбыт сырдык өйдөбүлү хаалларбыт ытыктыыр дьоммутун – умнуллубат ааттары!

Биэчэри иилээн-саҕалаан ыытта, СР үөрэҕириитин туйгуна, РФ иитиигэ уонна үөрэхтээһиҥҥэ бочуоттаах үлэһитэ Павлова Полина Дмитриевна.