2025 сыл биһиги дойдубутугар Өрөгөйдөөх Улуу Кыайыы 80 сылын бэлиэтиир сүдү бэлиэ сылбыт үүнээри турар.

Ахсынньы 3 күнүгэр «Чороон» НАК И.Е. Винокуров аатынан Хатыҥ-Арыы орто уонна Затоннааҕы оскуола үөрэнээччилэрэ, учууталлара, нэһилиэк олохтоохторо кыттыылаах Улуу Кыайыы 80 сылын көрсөр бастакы үөрүүлээх тэрээһин ыытылынна.

Нэһилиэкпит Баһылыга Иван Дмитриевич Ноговицын оҕолорго анаан сэрии кэминээҕи нэһилиэк олоҕун, историятн кэпсээтэ.

Олус суолталаах историческай докумуоннары, архивтартан булан, үөрэтэн, сааһылаан оҥорбут «Хатыҥ-Арыы нэһилиэк» дьаһалтатын байыаннай учуокка сүрүннүүр специалиһа Екатерина Васильевна Стрекаловская нэһилиэкпит Уордьаннаах буойуттарын уонна Кенигсберг куоракка сэриигэ кыттыбыт биир дойдулаахтарбыт туһунан иһитиннэрдэ.

Хатыҥ-Арыы нэһилиэгиттэн Аҕа Дойду улуу сэриитигэр кыттыбыт ини-биилэр уонна Ржев куораты босхолооһуҥҥа кыттыбыт буойуттар тустарынан И.Е. Винокуров аатынан кыраайы уонна история үөрэтэр Түмэл сэбиэдиссэйэ Нестеров Михаил Владимирович кэпсээтэ.

Кыайыы күнэ - Арассыыйа уонна аан дойду бары норуоттарын сомоҕолоһууларын күнэ.

2025 сылы – Өрөгөйдөөх Улуу Кыайыы 80 сылын бүтүн Россия дьоно үөрэ-көтө, түмсүүлээхтик көрсөргө бэлэммит.