Наммыт улууһугар быйыл 2024 сылга «Үрүҥ Кынат» бириэмийэ чэрчитинэн араас көрүҥнэргэ сыл устата нэһилиэктэринэн фестиваль ыытылынна. Ону түмүктүүр фольклор жанрын көрүҥнэригэр уонна уран тарбахтаахтар быыстапкаларыгар нэһилиэктэринэн көрүү ахсынньы 10 күнүгэр М.К. Аммосов аатынан Культура Дыбарыаһыгар ыытылынна.

Тойук күрэһигэр – нэһилиэкпит эдэр кэскиллээх ыччата Айсен Никонов кыттан 2 Үрдэл буолла.

 Норуот ырыатыгар - нэһилиэкпит дьоно уостан түһэрбэккэ ыллыыр «Хайабытын талаҕын?» диэн ырыанан Нарыйа Кулешова кыттан 1 Үрдэли ылан бу көрүҥҥэ кыайыылааҕынан таҕыста, «Дорҕоон» бөлөх (сал. П.Машников) кылыһах-кырыымпа тыаһатан доҕуһуоллаата.

Хомус көрүҥэр «Дабаан» хомус бөлөҕө (сал. М. Винокурова) кыттан 3 Үрдэл.

Оһуохайга – Эмиля Саввинова кыттан 2 Үктэли ылары ситистэ.

Ону таһынан уран тарбахтаахтар быыстапкаларын көрүүгэ бэриллибит көрүҥҥэ барытыгар кыттан бастаатыбыт, ол курдук

«Чочуллубут чороон» мастан кыһан чороон оҥорон Стрекаловскай Герасим Сидорович 1 Үрдэл.

«Умсулҕан» түмсүү (сал. Мальцева Д.И.) «Өбүгэ ситимэ» кыбытык тигиинэн көбүөр тигэн 1 Үрдэл.

«Туос тойуга» көрүҥҥэ маллаах иһит тигэн Сивцева Миролюбовь Григорьевна 2 Үрдэли ылла.

Фольклор уонна уран тарбахтаахтар быыстапкаларын түмүгүнэн Аппааны бөһүөлэгэ улахан нэһилиэктэргэ муҥутуур кыайыылааҕынан таҕыста.

Нэһилиэкпит уус-уран самодеятельноһын кыттыылаахтарыгар, уран тарбахтаах маастардарбытыгар барҕа махтал буолуохтун!