Ыам ыйын 7 күнүгэр Аппааны бөһүөлэгин Кыайыы Скверигэр Өрөгөйдөөх Улуу Кыайыы үөрүүлээх биир сомоҕо хаамыыта нэһилиэк олохтоохторо, тэрилтэ үлэһиттэрэ, оскуола оҕолоро кыттыылаах өрө күүрүүлээхтик ыытылынна.

Бу күн Аҕа дойду улуу сэриитин  кыттыылааҕа Николаев Егор Семенович балта Евдокия Семеновна, кыыһа Полина Егоровна Николаевалар аҕаларын уонна эһээлэрин үйэтитэр Кыайыы Скверигэр скамейка уонна ахтыы кинигэлэрин олохтоох И.Е. Винокуров түмэлигэр бэлэх ууннулар.

Үөрүүлээх митиҥҥэ эҕэрдэ тыллар, кыайыыны кынаттаабыт ырыалар, үҥкүүлэр, ону сэргэ үтүө үгэскэ кубулуйбут “Георгиевская лента”, “Письмо солдату”, итии чэйдээх сылаас саллаат хааһыта акциялар ыытылыннылар.

Убаастабыллаах ветераннарбытыгар итии чэйдээх, сылаас астаах истиҥ санааттан тахсар тэрээһиммит салгыы “Чороон” НАК буолла. Үгүс элбэх наҕараадалар, бэлэхтэр туттарылыннылар, ырыа-тойук, үҥкүү-битии оройуттан тутулунна.

Кыайыы оһуохайын таһаардылар Үлэ ветераннара, сэрии сылларын оҕолоро, сцена ветераннара Сивцева Варвара Наумовна уонна Евсеева Татьяна Ивановна.

 $IMAGE2$        

Киэһэ 21:00ч. Кыайыы скверигэр “Өйдөбүл төлөнө” акция элбэх ыччаты, оҕону түмэн ыытылынна.

Ыам ыйын 8 күнүгэр биир дойдулаахпыт, уһулуччулаах Государственнай уонна политическай деятель, сэрии сылларыгар саха омугу аччыктааһынтан быыһаабыт сүдү киһибитигэр И.Е. Винокуров пааматынньыгар сибэкки дьөрбөтүн ууруу үөрүүлээх тэрээһинэ ыытылынна. Улуустааҕы "Өйдөбүл төлөнө" ("Свеча акции") тэрээһиҥҥэ "Дуорай" эр дьон вокальнай ансаамбыл кыттыыны ылла. 

Ыам ыйын 9 күнүгэр улууспут киинигэр Намҥа Улуу кыайыы парадыгар, театрализованнай көстүүгэ, бырааһынньыктааҕы кэнсиэргэ Хатыҥ-Арыы нэһилиэк дьоно-сэргэтэ көхтөөх кыттыыны ыллылар.

“Чороон” НАК М.К. Аммосов аатынан болуоссакка ветераннарга, олохтоохторго, ыалдьыттарга анаан “Танцы под баян” тэрээһинин ыыттыбыт.

Бука бары нэһилиэкпит олохтоохторун, ветераннарын Улуу Кыайыы 80 сылынан эҕэрдэлиибит, этэҥҥэ, чэгиэн туруктаах сылдьаргытыгар баҕарабыт!