Балаҕан ыйын 27 күнүгэр Нам сэлиэнньэтигэр М.К. Аммосов болуоссатыгар ыытыллыбыт «Урожай-2025» күһүҥҥү тыа хаһаайыстыбатын дьаарбаҥкатыгар Хатыҥ-Арыы нэһилиэгэ бочуоттаах бастакы миэстэни ылла.

Ярмаркаҕа нэһилиэкпит олохтоохторо, кэтэх хаһаайыстыбалаах тэрээһиннэр оҕуруоттарын аһын, хортуоска, эт, көтөр этин арааһын, онтон да атын аһы хамаҕатык атылаатылар.

Сыллата улуус ыытар дьаарбаҥкаларыгар нэһилиэк дьаһалтата, култуура кииннэрэ, общественность бары биир санаанан түмсэннэр киэргэтэллэр, хаартыскаҕа түһэр миэстэ оҥорон дьаарбаҥка кыттыылаахтара дьиэ кэргэнинэн, коллективынан, биирдилээн кэлэн үөрэ-көтө түстүлэр.

Дьаарбаҥка күн улууска аан бастакытын «Тыа сирин бастыҥ ыала» диэн алта түһүмэхтээх күрэх ыытылынна. Биһиги нэһилиэкпититтэн Кыһыл Дэриэбинэ олохтоохторо Манчаары Аполлонович, Марианна Романовна Бушуевтар кыыстара Елизавета кыттаннар, бочуоттаах үһүс миэстэни ыллылар.

Дьаарбаҥка уопсай түмүгүнэн: 1 м- Хатыҥ-Арыы нэһилиэгэ, 2 м. – Ленскэй нэһилиэгэ, 3 м. – Үөдэй нэһилиэгэ ыланнар, сыаналаах бэлэҕинэн наҕараадаланнылар.

Дьаарбаҥкаҕа көхтөөхтүк кыттан, киэргэтии оҥорон, Саха республикатын Судаарыстыбаннаһын күнүнэн сахалыы толору астаах остуолунан уонна Намнааҕы техникум асчыта Александр Васильев оҥорбут туордунан дьаарбаҥка кыттылаахтарын күндүлээн, күһүнү уруйдуур хаартыскаҕа түһэр миэстэ оҥоһуллан, нэһилиэкпит олохтоохторо ас астаан аҕалан, нэһилиэкпит «Чороон», «Самородок», «Сайдыы» кииннэрин үлэһиттэрэ, художественнай оформитель Петр Машников оформление оҥорон, кырааскалаан, дьахтар сүбэтин председателэ Дария Мальцева идеятынан киэргэтиллэн, общественность уонна нэһилиэкпит баһылыга Иван Ноговицын, специалистар Надежда Сивцева, Алексей Евсеев, Екатерина Стручкова күүскэ үлэлэһэннэр, олохтоохторбут кэлэн бэйэ бородууксуйаларын уонна сайыны быһа бүөбэйдээн улаатыннарбыт оҕуруоттарын аһын күүскэ атылааннар, ситиһии өрөгөйүн биллибит.