Олунньу 27 күнүгэр «Чороон» норуот айымньытын киинигэр Хатыҥ-Арыы нэһилиэгин бүтүн Саха сиригэр аатырдыбыт «Дуорай» эр дьон ырыа ансаамбыла тэриллибитэ 20 сыллаах өрөгөйдөөх үбүлүөйдээх кэнсиэрэ үрдүк таһымҥа, дохсун ытыс тыаһынан буолан ааста.

«Дуорай» эр дьон вокальнай ансаамбыла 2005 сылтан таһаарыылаахтык, ситиһиилээхтик үлэлиир. «Эр дьон ыллыыллар» Республиканскай ырыа конкурсун хас да төгүллээх лауреаттара, дипломаннара. Ансаамбылы салайаллар СР культуратын туйгуттара Саргылана Пономарева уонна Ариан Васильев.

«Дуорай» солистарынан Петр Сивцев, Андрей Слепцов, Михаил Сивцев, Петр Машников, Андрей Замятин буолаллар.

«Дуорай» эр дьон вокальнай ансаамбыла Нам улууһугар эрэ буолбакка бүтүн Республикаҕа биллэр ырыа ансаамбыла буолар. 2005 сылтан тэриллиэҕиттэн нэһилиэк, улуус чиэһин Республикаҕа көмүскүүр, ааттатар Нам улууһун биир бастыҥ эр дьон ансаамбыла аатын ылыан ылар.

Региональнай, республиканскай ырыа конкурстарын хас да төгүллээх лауреаттара, Гран При хаһаайыттара.

Үрдүк ситиһиилэринэн «Грани алмаза» Саха Республикатын улахан премиятын «Лучший творческий коллектив» номинация муҥутуур кыайыылаахтара.

Кэнсиэри кэлэн көрбүт дьон олус астынан, дуоһуйан, махтанан тарҕастылар. Кэнсиэри иилээн-саҕалаан Александр Дьяконов үрдүк таһымҥа ыытта.

«Дуорай» ырыа ансаамбылыгар өссө үрдүк ситиһиилэри, кыайыылары-хотуулары баҕарабыт. Салгыы да тапталлаах нэһилиэкпит, улууспут аатын киэҥ араҥаҕа тиэрдэ уонна аатырда туруҥ диэн баҕа санаабытын эһиэхэ аныыбыт.