Муус устар 27 күнэ – саха норуотун олоҕор чахчы быһаарыылаах уонна суолталаах күн буолар. 1922 сыллаахха муус устар 27 күнүгэр  - Саха Автономнай Советскай Социалистическай республика төрүттэммитэ. 70 сыл ааспытын кэнниттэн, 1992 с. Муус устар 27 күнүгэр республикабыт саҥа Конституцияламмыта. Онтон муус устар 27 күнэ – Саха Республикатын күнүнэн биллэриллибитэ.

2026 сыл Бүтүн Өрөспүүбүлүкэ, Нам улууһа уһулуччулаах судаарыстыбыннай уонна политическай деятелэ Илья Егорович Винокуров төрөөбүтэ 130 сылын бэлиэтиир өрөгөйдөөх сылбыт!

Быйыл Нам улууһугар, Хатыҥ-Арыы нэһилиэгэр И.Е. Винокуров сылынан биллэриллибитэ.

Муус устар 25 күнүгэр Илья Егорович Винокуров скверыгар Илья Егорович Винокуров аатынан Хатыҥ-Арыы орто оскуолатын үөрэнээччилэрэ “Чаҕылыс” литературнай бөлөх “Дьон дьолун туһугар олоххун анаатыҥ” хоһоон дьүһүйүүтүнэн тэрээһиммитин саҕалаатыбыт. Салайааччы – Саха Өрөспүүбүлүкэтин үөрэҕириитин туйгуна, Российскай Федерация иитиигэ уонна үөрэхтээһиҥҥэ бочуоттаах үлэһитэ Анна Ефимовна Васильева.

Бу үөрүүлээх күн биһиэхэ ытык-мааны ыалдьыттар кэллилэр: Саха Өрөспүүбүлүкэтин Ил Түмэнин Бэрэссэдээтэлин солбуйааччы Афанасий Семенович  ВЛАДИМИРОВ; Саха Өрөспүүбүлүкэтин Бырабыытылстыбатын Бэрэссэдээтэлин солбуйааччы Ким Александрович БОРИСОВ; Нам улууһа муниципальнай оройуон баһылыга Юрий Иннокентьевич СЛЕПЦОВ; Саха Өрөспүүбүлүкэтин Тас сибээстэргэ уонна норуоттар икки ардыларынааҕы сыһыаннарга Миниистирэ, Нам улууһун куратора Гаврил Витальевич КИРИЛЛИН;

Ону тэҥэ Хатыҥ-Арыы нэһилиэгэ Тыа сирин түөлбэтин баһылыга Иван Дмитриевич НОГОВИЦЫН; Саха Өрөспүүбүлүкэтин Бырабыытылстыбатын чилиэннэрэ, норуот депутаттарара, Нам улууһун, Хатыҥ-Арыы нэһилиэгин олохтоохторо, общественноһа, тэрилтэ салайааччылара, оскуола үөрэнээччилэрэ.

Норуоттан үүнэн тахсыбыт, ыарахан сылларга норуот туһугар оло5ун анаабыт, норуотун чиэһин туруулаһан көмүскээбит уһулуччулаах Государственнай уонна политическай деятель Илья Егорович Винокуров өлбөт-сүппэт өңөлөрүн билинэн, киниэхэ сүгүрүйэн уонна кини аатын үйэтитэн  ытыктаан ыалдьыттарбыт сибэкки дьөрбөтүн уурдулар.