Саха сирин уһулуччулаах Государственнай уонна политическай деятелэ Илья Егорович Винокуров төрөөбүтэ 130 уонна «Хатыҥ-Арыы» сопхуос тэриллибитэ 50 сылларыгар аналлаах Хатыҥ-Арыы, Бөтүҥ, Искра нэһилиэктэрин холбоһук ҮБҮЛҮӨЙДЭЭХ ЫҺЫАҔА үөрүүлээхтик ыытылынна.

Хатыҥ-Арыы нэһилиэгин Кыһыл Дэриэбинэтин «Хатыҥ-Чараҥ» ыһыахтыыр түһүлгэтигэр бэс ыйын 18 күнүгэр Саха сирин уһулуччулаах Государственнай уонна политическай деятелэ Илья Егорович Винокуров төрөөбүтэ 130 уонна «Хатыҥ-Арыы» сопхуос тэриллибитэ 50 сылларыгар аналлаах Хатыҥ-Арыы, Бөтүҥ, Искра нэһилиэктэрин холбоһук ҮБҮЛҮӨЙДЭЭХ ЫҺЫАҔА үөрүүлээхтик ыытылынна.

Үбүлүөйдээх ыһыах быйыл 2026 сылга «Хатыҥ-Арыы» совхоз тэриллибитэ өрөгөйдөөх 50 сылын бэлиэтээн өрө көтөҕүүлээхтик, өрө күүрүүлээхтик Аппааны, Кыһыл дэриэбинэ, Бөтүҥ, Искра отделениетыгар үлэлээбит ветераннар сомоҕо сэлэлии хаамыыларыттан саҕаланна.

Ыһыах аһыллыытын сиэрэ-туома ыытылынна - дьон-сэргэ ыраастанан, арчыланан, алгыс ылан санаалара көтөҕүллэн, үөрүүлэрэ үксээтэ, үс куттара бөҕөргөөтө.

Ыһыах үөрүүлээх чааһыгар улуус баһылыга Слепцов Ю.И., Нам улууһун Депутаттарын сэбиэтин салайааччыта Винокуров А.И., Хатыҥ-Арыы, Бөтүҥ, Искра тыа сирин сэлиэнньэлэрин баһылыктара уонна күүтүүлээх ыалдьыттарбыт И.Е. Винокуров уола Валерий Ильич Винокуров, сиэнэ Илья Петрович Гылыков, хос сиэнэ Лена Ильинична Павлова, хос хос сиэнэ Маша ыһыах түһүлгэтин ытык-мааны ыалдьыттара буоллулар.

«Үрүҥ Тунах Ыһыаҕынан» сомоҕо эҕэрдэ кэнсиэргэ нэһилиэктэр коллективтара кыттыыны ыллылар.

Ыһыахха кэлбит ыалдьыттар, ыһыах бары кыттыылаахтара сахалыы үгэһи тутуһан күргүөмүнэн дьүрүскэн хомус тыаһынан дойдуларын, айылҕаларын арчылаан, бэйэлэрэ араҥаччыланан, ыраастанан, сүргэлэрин көтөҕөн бөҕөргөтүннүлэр.

Үрүҥ тунах ыһыах добун оһуохайыгар дьон-сэргэ киирэн сэниэ-күүс ылыннылар.

Түһүлгэлээн олоруу кэннэ араас түһүлгэлэринэн күрэстэр ыытылыннылар, ол курдук күүстээхтэргэ, быһыйдарга саха биэс төрүт көрүҥнэригэр „Өбүгэ оонньуулара“, оҕолорго анаан араас күрэстэр, улахан дьоҥҥо сахалыы таҥаска, хомуска, оһуохайга конкурстар ыытылыннылар.

Ыһыах биир күүтүүлээх түгэнинэн буолла сүүйүүлээх оонньуу, көҕүлээн тэрийэн ыыттылар Хатыҥ-Арыы нэһилиэгин биир бастыҥ үлэһит мааны ыала Галина Герасимовна, Иван Захарович Афанасьевтар дьиэ кэргэн. Сүрүн бириис УБАҺА уонна да элбэх сыаналаах бириистэр оонньоннулар.

Киэһэ өттүгэр ыһыах ыҥырыылаах маанылаах ыалдьыттарынан Саха эстрадатын ырыаһыттарын ОЛИМПИЯ уонна Игорь Егоров Уйгулаах Ыһыаҕынан эҕэрдэ кэнсиэрэ буолла.

Самаан сайын кэлбитинэн, уйгу-быйан Ыһыахтарынан күндү бар дьоммут!

Арыы чэчир анньылынна, сир Ийэ сириэдийдэ, Алгыс тыла ил гынна, дьолбут тосхойдо.

Уруй-туску! Айхал-мичил!