Кулун тутар 22-23 күннэригэр Нам улууһун Хатырык нэһилиэгэр «Ыччат олоҥхоһут» Республикатааҕы общественнай түмсүү ыытар «Куйуур Олоҥхото - 2019» олоҥхону толорор ыччаттар республикатааҕы күөн-күрэстэрин Нам улууһун чулуу олоҥхоһута Василий Николаевич Попов – Бочоох төрөөбүтэ 110 сылын көрсө ыытылынна. 5 төгүлүн ыытыллар күрэскэ уопсайа 46 ыччат кыттыыны ылла. Дьүүллүүр сүбэҕэ М.К. Аммосов аатынан ХИФУ профессора Г.С. Попова – Санаайа, Республикатааҕы «Олоҥхо киинин» сүрүннүүр үлэһитэ У.М. Флегонтова, Нам улууһун Култуураҕа уонна духуобнуай сайдыыга управлениетын специалиһа М.А. Платонова буоллулар. Манна «Чороон» СК уус-уран салайааччыта Марианна Винокурова П.П. Ядрихинскай – Бэдьээлэ «Дьырыбына Дьырылыатта Кыыс Бухатыыр» олоҥхотун толорон «Кылыһах ырыалаах, дорҕоон тойуктаах олоҥхоһут» анал аакка тиксэн, дьүүллүүр сүбэ биһирэбилин ылла.